Соён гэгээрүүлэгч, зохиолч, яруу найрагч Г.Аюурзана "Шидийн барилдлага" нэртэй шинэхэн шүлгийн түүврээ хэвлүүлжээ. Уг бүтээл нь зохиолчийн энэ онд гаргахаар төлөвлөсөн гурван номын эхнийх юм.
Яруу найрагч бүхэн л өөрсдийн дуу хоолой, үзэл санаа, философи, мэдрэмжтэй байдаг. Зарим нь цул бүхэллэг чанарыг бий болгосноор таньж мэдэрсэн, урлаж зүйсэн нь бөмбөрийн хэмнэл, төгөлдөр хуурын аялгуу, цөн түрэх нүсэр чимээ, салхины хүнгэсэн дуутай байх нь бий. Г.Аюурзаны яруу найргаас ямагт л зэнгийн хоосон чанарын бясалгал, нар мандаж, жаргах агшны үзэсгэлэн хийгээд байгалийн нам гүм анир ахуй мэдрэгддэг.
