“Талын түмэн адуу” эвент арав дахь жилдээ  зохиогдох гэж байна.  Өмнөх жилүүдэд Хэнтий аймгийн Батноров суманд зохион байгуулагддаг байсан бол энэ удаа Чингис хотноо зохиогдох юм. 

Энэхүү соёлын арга хэмжээг санаачлагч нь “Мөнх харилцаа” төрийн бус байгууллага бөгөөд уг фестиваль арваннэгдүгээр сарын 21-24-ний өдрүүдэд болохоор товоо зарлалаа. Уг эвент нь өвлийн аялал жуулчлалын үед зохиогддог, дотоод гадаадын аялагчдын зорьж ирдэг наадмуудын нэг болон жилээс жилд хүрээгээ тэлэн хөгжиж байгаа юм. Энэ үеэр үндэсний дархчуудын дунд эртнээс алдартай “тожил хийц”-ийн гайхамшгийг илэрхийлэн харуулдаг “Батноровын уран дархчууд” үзэсгэлэн дэлгэгдэхээс гадна тайга нохойны үзүүлбэр, “Адуучин” тэмцээн гээд олон сонирхолтой тэмцээн наадгай болно.  

Монголчууд бидний ахуй соёлд хүндтэй орон зай эзэлдэг адууны соёлыг түгээн дэлгэрүүлэх зорилготой энэ наадмын үеэр та бүхэн морьтнуудын дундаас шалгаруулах сайхан хос тодруулах тэмцээн, шилдэг адуучид оролцсон хамгийн өндөр шагналын сантай адуучин уралдаан, адууны зүс нэрлэж цэцээ шалгах наадаан, дээлтэй барилдаан гэх мэт тун сонирхолтой зүйлсийг үзэж баясах юм.